ਗੁੰਮਟੀ ਵਿਖੇ ਚੋਰਾਂ ਨੇ ਦਿੱਤਾ ਵੱਡੀ ਵਾਰਦਾਤ ਨੂੰ ਅੰਜਾਮ; ਇੱਕੋ ਰਾਤ 'ਚ 7 ਕਿਸਾਨਾਂ ਦੇ ਟਰਾਂਸਫਾਰਮਰ ਚੋਰੀ, ਪ੍ਰਸ਼ਾਸਨ ਅੱਗੇ ਗੁਹਾਰ

ਇਸ ਮੌਕੇ ਪੀੜਤ ਕਿਸਾਨਾਂ ਬਹਾਦਰ ਸਿੰਘ, ਰੇਵਲ ਸਿੰਘ, ਦਰਸ਼ਨ ਸਿੰਘ ਗੁੰਮਟੀ ਤੇ ਗੁਰਮੇਲ ਸਿੰਘ ਠੁੱਲੀਵਾਲ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਪਿੰਡ ਗੁੰਮਟੀ ਤੋਂ ਠੁੱਲੀਵਾਲ ਨੂੰ ਜਾਂਦੀ ਲਿੰਕ ਸੜਕ ਦੇ ਨਾਲ ਲੱਗਦੇ ਖੇਤਾਂ ’ਚ ਬੀਤੀ ਰਾਤ ਇੱਕ ਸੁਚੱਜੇ ਢੰਗ ਨਾਲ ਸਰਗਰਮ ਚੋਰ ਗਿਰੋਹ ਨੇ ਵਾਰਦਾਤ ਨੂੰ ਅੰਜਾਮ ਦਿੱਤਾ। ਚੋਰਾਂ ਨੇ ਖੇਤੀ ਲਈ ਲੱਗੇ ਸਰਕਾਰੀ ਟਰਾਂਸਫਾਰਮਰਾਂ ਨੂੰ ਤੋੜਕੇ ਉਨ੍ਹਾਂ ’ਚੋਂ ਤਾਂਬਾ, ਤੇਲ ਅਤੇ ਹੋਰ ਕੀਮਤੀ ਸਮਾਨ ਕੱਢ ਲਿਆ, ਜਦਕਿ ਕੁਝ ਟਰਾਂਸਫਾਰਮਰ ਆਪਣੇ ਨਾਲ ਹੀ ਲੈ ਗਏ। ਕਿਸਾਨਾਂ ਨੇ ਦੱਸਿਆ ਕਿ ਬਹਾਦਰ ਸਿੰਘ, ਸੁਰਜੀਤ ਸਿੰਘ, ਹਾਕਮ ਸਿੰਘ, ਅਜੈਬ ਸਿੰਘ, ਧਰਮਿੰਦਰ ਸਿੰਘ ਅਤੇ ਕੁਲਦੀਪ ਸਿੰਘ ਦੇ 25 ਕੇ.ਵੀ. ਸਮਰੱਥਾ ਵਾਲੇ ਟਰਾਂਸਫਾਰਮਰ, ਜਦਕਿ ਦਰਸ਼ਨ ਸਿੰਘ ਦੇ ਖੇਤ ’ਚ ਲੱਗਾ 63 ਕੇਵੀ ਟਰਾਂਸਫਾਰਮਰ ਚੋਰਾਂ ਦਾ ਨਿਸ਼ਾਨਾ ਬਣਿਆ। ਇਹ ਸਾਰੇ ਟਰਾਂਸਫਾਰਮਰ ਬਿਜਲੀ ਵਿਭਾਗ ਵੱਲੋਂ ਕਿਸਾਨਾਂ ਨੂੰ ਸਿੰਚਾਈ ਦੀ ਸਹੂਲਤ ਦੇਣ ਲਈ ਲਗਾਏ ਗਏ ਸਨ। ਉਨ੍ਹਾਂ ਦੱਸਿਆ ਕਿ ਸਵੇਰੇ ਜਦੋਂ ਕਿਸਾਨ ਆਪਣੇ ਖੇਤਾਂ ’ਚ ਫਸਲਾਂ ਦੀ ਦੇਖਭਾਲ ਅਤੇ ਪਸ਼ੂਆਂ ਲਈ ਹਰਾ ਚਾਰਾ ਲੈਣ ਪਹੁੰਚੇ ਤਾਂ ਟਰਾਂਸਫਾਰਮਰਾਂ ਦੀ ਹਾਲਤ ਵੇਖਕੇ ਉਨ੍ਹਾਂ ਦੇ ਹੋਸ਼ ਉੱਡ ਗਏ। ਮੌਕੇ 'ਤੇ ਟਰਾਂਸਫਾਰਮਰ ਟੁੱਟੇ ਹੋਏ ਸਨ ਅਤੇ ਉਨ੍ਹਾਂ ’ਚੋਂ ਕੀਮਤੀ ਤਾਂਬਾ, ਤੇਲ ਅਤੇ ਹੋਰ ਸਮਾਨ ਗਾਇਬ ਸੀ। ਇੱਕੋ ਇਲਾਕੇ ’ਚ ਸੱਤ ਟਰਾਂਸਫਾਰਮਰਾਂ ਨੂੰ ਨਿਸ਼ਾਨਾ ਬਣਾਏ ਜਾਣ ਨਾਲ ਪੂਰੇ ਇਲਾਕੇ ਦੇ ਕਿਸਾਨਾਂ ’ਚ ਡਰ ਅਤੇ ਚਿੰਤਾ ਦਾ ਮਾਹੌਲ ਬਣ ਗਿਆ ਹੈ।