ਸਮਾਰਟਫੋਨ ਹੋ ਗਿਆ ਹੈ ਗਿੱਲਾ? ਹੇਅਰ ਡਰਾਇਰ ਜਾਂ ਫੂਕ ਮਾਰਨ ਦੀ ਬਜਾਏ ਇੰਜ ਬਚਾਓ ਆਪਣੀ ਡਿਵਾਈਸ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ। ਭਾਰਤ ਵਿੱਚ ਇਸ ਸਮੇਂ ਜ਼ਿਆਦਾਤਰ ਸੂਬਿਆਂ ਵਿੱਚ ਜ਼ੋਰਦਾਰ ਬਾਰਸ਼ ਹੋ ਰਹੀ ਹੈ। ਅਜਿਹੇ ਵਿੱਚ ਜੇਕਰ ਤੁਹਾਡਾ ਫੋਨ ਬਾਰਸ਼ ਵਿੱਚ ਅਚਾਨਕ ਭਿੱਜ ਜਾਂਦਾ ਹੈ, ਤਾਂ ਆਮ ਤੌਰ 'ਤੇ ਤੁਰੰਤ ਘਬਰਾਹਟ ਹੋਣ ਲੱਗਦੀ ਹੈ। ਪਰ ਚਿੰਤਾ ਨਾ ਕਰੋ, ਤੇਜ਼ੀ ਨਾਲ ਅਤੇ ਸਹੀ ਤਰੀਕੇ ਨਾਲ ਕੰਮ ਕਰਕੇ ਤੁਸੀਂ ਆਪਣੀ ਡਿਵਾਈਸ ਨੂੰ ਬਚਾ ਸਕਦੇ ਹੋ। ਆਓ ਜਾਣਦੇ ਹਾਂ ਤੁਹਾਨੂੰ ਅਸਲ ਵਿੱਚ ਕੀ ਕਰਨਾ ਚਾਹੀਦਾ ਹੈ ਅਤੇ ਕੀ ਨਹੀਂ ਕਰਨਾ ਚਾਹੀਦਾ।

ਤੁਰੰਤ ਕੀਤੇ ਜਾਣ ਵਾਲੇ ਕੰਮ

ਫੋਨ ਤੁਰੰਤ ਬੰਦ ਕਰੋ: ਜੇਕਰ ਫੋਨ ਚਾਲੂ ਹੈ, ਤਾਂ ਇਸ ਨੂੰ ਤੁਰੰਤ ਬੰਦ ਕਰ ਦਿਓ। ਜੇਕਰ ਇਹ ਪਹਿਲਾਂ ਹੀ ਬੰਦ ਹੈ, ਤਾਂ ਇਸ ਨੂੰ ਬੰਦ ਹੀ ਰਹਿਣ ਦਿਓ। ਫੋਨ ਚਾਲੂ ਰੱਖਣ ਨਾਲ ਸ਼ਾਰਟ ਸਰਕਟ ਹੋ ਸਕਦਾ ਹੈ ਜੋ ਮਦਰਬੋਰਡ ਨੂੰ ਹਮੇਸ਼ਾ ਲਈ ਖ਼ਰਾਬ ਕਰ ਦਿੰਦਾ ਹੈ।

ਪਾਰਟਸ ਵੱਖ ਕਰੋ: ਆਪਣੇ ਫੋਨ ਦਾ ਕਵਰ, ਸਿਮ ਕਾਰਡ ਟ੍ਰੇ ਅਤੇ ਕੋਈ ਵੀ ਮੈਮੋਰੀ ਕਾਰਡ ਕੱਢ ਦਿਓ। ਜੇਕਰ ਤੁਹਾਡੇ ਕੋਲ ਰਿਮੂਵੇਬਲ ਬੈਟਰੀ ਵਾਲਾ ਪੁਰਾਣਾ ਫੋਨ ਹੈ, ਤਾਂ ਉਸ ਨੂੰ ਵੀ ਬਾਹਰ ਕੱਢ ਲਵੋ। ਇਸ ਨਾਲ ਅੰਦਰ ਫਸੇ ਪਾਣੀ ਨੂੰ ਬਾਹਰ ਨਿਕਲਣ ਦਾ ਰਸਤਾ ਮਿਲਦਾ ਹੈ।

ਪੂੰਝ ਕੇ ਸੁਕਾਓ: ਸਤ੍ਹਾ ਦੀ ਸਾਰੀ ਨਮੀ ਨੂੰ ਸੋਖਣ ਲਈ ਇੱਕ ਮਾਈਕ੍ਰੋਫਾਈਬਰ ਕੱਪੜੇ ਜਾਂ ਸਾਫ਼ ਤੌਲੀਏ ਦੀ ਵਰਤੋਂ ਕਰੋ।

ਇਹ ਗ਼ਲਤੀਆਂ ਨਾ ਕਰੋ

ਚੌਲਾਂ ਵਾਲਾ ਜੁਗਾੜ: ਆਪਣੇ ਫੋਨ ਨੂੰ ਕੱਚੇ ਚੌਲਾਂ ਦੇ ਭਾਂਡੇ ਵਿੱਚ ਨਾ ਰੱਖੋ। ਚੌਲ ਨਮੀ ਸੋਖਣ ਵਿੱਚ ਬਹੁਤ ਹੌਲੀ ਹੁੰਦੇ ਹਨ, ਅਤੇ ਇਸ ਦੇ ਸਟਾਰਚ ਵਾਲੇ ਧੂੜ ਦੇ ਕਣ ਅਤੇ ਛੋਟੇ ਦਾਣੇ ਤੁਹਾਡੇ ਚਾਰਜਿੰਗ ਪੋਰਟ ਅਤੇ ਹੈੱਡਫੋਨ ਜੈਕ ਵਿੱਚ ਫਸ ਸਕਦੇ ਹਨ, ਜਿਸ ਨਾਲ ਹੋਰ ਨੁਕਸਾਨ ਹੋ ਸਕਦਾ ਹੈ।

ਗਰਮੀ ਵਾਲਾ ਜੁਗਾੜ: ਕਦੇ ਵੀ ਹੇਅਰ ਡਰਾਇਰ, ਮਾਈਕ੍ਰੋਵੇਵ ਜਾਂ ਓਵਨ ਦੀ ਵਰਤੋਂ ਨਾ ਕਰੋ। ਬਹੁਤ ਜ਼ਿਆਦਾ ਗਰਮੀ ਪਲਾਸਟਿਕ ਦੇ ਹਿੱਸਿਆਂ ਨੂੰ ਖ਼ਰਾਬ ਕਰ ਸਕਦੀ ਹੈ, ਸਕ੍ਰੀਨ ਨੂੰ ਚਿਪਕਾਉਣ ਵਾਲੀ ਗੂੰਦ ਨੂੰ ਪਿਘਲਾ ਸਕਦੀ ਹੈ ਅਤੇ ਬੈਟਰੀ ਨੂੰ ਡੈਮੇਜ ਕਰ ਸਕਦੀ ਹੈ।

ਫੂਕ ਮਾਰਨ ਵਾਲਾ ਜੁਗਾੜ: ਪੋਰਟਸ ਦੇ ਅੰਦਰ ਫੂਕ ਨਾ ਮਾਰੋ। ਫੋਨ ਵਿੱਚ ਹਵਾ ਪੰਪ ਕਰਨ ਨਾਲ ਪਾਣੀ ਅੰਦਰੂਨੀ ਹਿੱਸਿਆਂ ਵਿੱਚ ਹੋਰ ਡੂੰਘਾ ਚਲਿਆ ਜਾਂਦਾ ਹੈ।

ਫੋਨ ਸੁਕਾਉਣ ਦਾ ਸਹੀ ਤਰੀਕਾ

ਸਿਲਿਕਾ ਜੈੱਲ ਦੀ ਵਰਤੋਂ ਕਰੋ: ਚੌਲਾਂ ਦੀ ਬਜਾਏ, ਆਪਣੇ ਫੋਨ ਨੂੰ ਸਿਲਿਕਾ ਜੈੱਲ ਦੇ ਕੁਝ ਪੈਕੇਟਾਂ ਦੇ ਨਾਲ ਇੱਕ ਸੀਲਬੰਦ ਡੱਬੇ ਜਾਂ ਜ਼ਿਪ-ਲਾਕ ਬੈਗ ਵਿੱਚ ਰੱਖੋ (ਇਹ ਉਹੀ ਛੋਟੇ ਕਾਗਜ਼ ਦੇ ਪੈਕੇਟ ਹੁੰਦੇ ਹਨ ਜੋ ਨਵੇਂ ਜੁੱਤਿਆਂ ਦੇ ਡੱਬਿਆਂ ਵਿੱਚ ਮਿਲਦੇ ਹਨ)। ਇਹ ਨਮੀ ਨੂੰ ਬਹੁਤ ਤੇਜ਼ੀ ਨਾਲ ਸੋਖਦੇ ਹਨ।

ਏਅਰ-ਡਰਾਈ ਮੈਥਡ : ਜੇਕਰ ਤੁਹਾਡੇ ਕੋਲ ਸਿਲਿਕਾ ਜੈੱਲ ਨਹੀਂ ਹੈ, ਤਾਂ ਫੋਨ ਨੂੰ ਇੱਕ ਹਵਾਦਾਰ ਕਮਰੇ ਵਿੱਚ ਸੁੱਕੇ ਤੌਲੀਏ 'ਤੇ ਸਿੱਧਾ ਲਿਟਾ ਕੇ ਛੱਡ ਦਿਓ। ਬਿਹਤਰ ਹੋਵੇਗਾ ਕਿ ਇਸ ਦੇ ਕੋਲ ਇੱਕ ਪੰਖਾ ਚਲਾ ਦਿਓ ਜੋ ਠੰਢੀ ਹਵਾ ਦੇ ਰਿਹਾ ਹੋਵੇ।

ਧੀਰਜ ਰੱਖੋ: ਫੋਨ ਨੂੰ ਦੁਬਾਰਾ ਚਾਲੂ ਕਰਨ ਦੀ ਕੋਸ਼ਿਸ਼ ਕਰਨ ਤੋਂ ਪਹਿਲਾਂ ਘੱਟੋ-ਘੱਟ 24 ਤੋਂ 48 ਘੰਟਿਆਂ ਲਈ ਉਸ ਨੂੰ ਇੰਜ ਹੀ ਛੱਡ ਦਿਓ।