ਮੈਕਸੀਕੋ ਵਿੱਚ ਲਾਈਵ ਟੀਵੀ ਦੌਰਾਨ ਗੁੱਸੇ ਵਿੱਚ ਆਏ ਹੋਸਟ ਨੇ ਡਰੋਨ ਨੂੰ ਮਾਰੀ ਲੱਤ, ਕੋਲੰਬੀਆਈ ਮਾਡਲ ਦੇ ਚਿਹਰੇ ’ਤੇ ਲੱਗੀ ਸੱਟ

ਡਿਜੀਟਲ ਡੈਸਕ, ਮੈਕਸੀਕੋ ਸਿਟੀ: ਮੈਕਸੀਕੋ ਵਿੱਚ ਇੱਕ ਮਸ਼ਹੂਰ ਟੀਵੀ ਹੋਸਟ ਨੇ ਲਾਈਵ ਪ੍ਰਸਾਰਣ ਦੌਰਾਨ ਗੁੱਸੇ ਵਿੱਚ ਪ੍ਰੋਡਕਸ਼ਨ ਡਰੋਨ ਨੂੰ ਲੱਤ ਮਾਰ ਦਿੱਤੀ। ਇਸ ਤੋਂ ਬਾਅਦ ਡਰੋਨ ਉੱਛਲ ਕੇ ਸਿੱਧਾ ਇੱਕ ਮਹਿਲਾ ਪ੍ਰਤੀਯੋਗੀ ਦੇ ਚਿਹਰੇ ’ਤੇ ਜਾ ਲੱਗਾ, ਜਿਸ ਕਾਰਨ ਉਹ ਜ਼ਖ਼ਮੀ ਹੋ ਗਈ। ਇਹ ਘਟਨਾ 26 ਅਕਤੂਬਰ ਨੂੰ ਮੋਂਟੇਰੇ ਸ਼ਹਿਰ ਵਿੱਚ ਚੈਨਲ 6 ’ਤੇ ਪ੍ਰਸਾਰਿਤ ਹੋਣ ਵਾਲੇ ਮਨੋਰੰਜਨ ਸ਼ੋਅ ‘ਐਸ ਸ਼ੋਅ’ (Es Show) ਦੌਰਾਨ ਵਾਪਰੀ।

ਜਾਣਕਾਰੀ ਅਨੁਸਾਰ, ਹੋਸਟ ਅਰਨੈਸਟੋ ਚਵਾਨਾ ਸਟੂਡੀਓ ਵਿੱਚ ਉੱਡ ਰਹੇ ਛੋਟੇ ਡਰੋਨ ਤੋਂ ਪਰੇਸ਼ਾਨ ਹੋ ਗਏ ਸਨ। ਗੁੱਸੇ ਵਿੱਚ ਉਨ੍ਹਾਂ ਨੇ ਡਰੋਨ ਨੂੰ ਲੱਤ ਮਾਰ ਦਿੱਤੀ, ਪਰ ਡਰੋਨ ਉੱਪਰ ਵੱਲ ਉੱਛਲ ਕੇ ਕੋਲੰਬੀਆਈ ਮਾਡਲ ਅਤੇ ਡਾਂਸਰ ਇਸਾਬੇਲਾ ਰੋਜਾਸ, ਜੋ ‘ਲਾ ਕੋਲੰਬੀਆਨਾ’ ਦੇ ਨਾਂ ਨਾਲ ਜਾਣੀ ਜਾਂਦੀ ਹੈ, ਦੇ ਚਿਹਰੇ ਨਾਲ ਟਕਰਾ ਗਿਆ।

ਦਰਦ ਕਾਰਨ ਰੋਜਾਸ ਤੁਰੰਤ ਝੁਕ ਗਈ ਅਤੇ ਇਲਾਜ ਲਈ ਕੁਝ ਸਮੇਂ ਵਾਸਤੇ ਸੈੱਟ ਤੋਂ ਬਾਹਰ ਜਾਣਾ ਪਿਆ। ਸਟੂਡੀਓ ਦੀ ਵੀਡੀਓ ਵਿੱਚ ਹਫੜਾ-ਦਫੜੀ ਦਾ ਮਾਹੌਲ ਦਿਖਾਈ ਦਿੱਤਾ। ਸ਼ੋਅ ਦੇ ਹੋਰ ਮੈਂਬਰ ਮਾਡਲ ਦੀ ਮਦਦ ਲਈ ਉਸ ਵੱਲ ਦੌੜੇ। ਬਾਅਦ ਵਿੱਚ ਰੋਜਾਸ ਨੇ ਆਪਣੇ ਸੋਸ਼ਲ ਮੀਡੀਆ ਫਾਲੋਅਰਜ਼ ਨੂੰ ਦਿਖਾਇਆ ਕਿ ਸੱਟ ਕਾਰਨ ਉਸ ਦੇ ਬੁੱਲ੍ਹ ’ਤੇ ਕੱਟ ਲੱਗ ਗਿਆ ਸੀ।

ਸੋਸ਼ਲ ਮੀਡੀਆ ’ਤੇ ਲੋਕਾਂ ਨੇ ਕੀਤੀ ਆਲੋਚਨਾ

ਇਸ ਘਟਨਾ ਦੀ ਵੀਡੀਓ ਆਨਲਾਈਨ ਵਾਇਰਲ ਹੋਣ ਤੋਂ ਬਾਅਦ ਲੋਕਾਂ ਨੇ ਤਿੱਖੀਆਂ ਪ੍ਰਤੀਕਿਰਿਆਵਾਂ ਦਿੱਤੀਆਂ। ਕਈ ਲੋਕਾਂ ਨੇ ਹੋਸਟ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਮਾਡਲ ਦੇ ਜ਼ਖ਼ਮੀ ਹੋਣ ਤੋਂ ਬਾਅਦ ਉਸ ਨੇ ਤੁਰੰਤ ਮੁਆਫ਼ੀ ਨਹੀਂ ਮੰਗੀ।

ਇੱਕ ਯੂਜ਼ਰ ਨੇ ਲਿਖਿਆ ਕਿ ਸਭ ਤੋਂ ਮਾੜੀ ਗੱਲ ਇਹ ਸੀ ਕਿ ਲੜਕੀ ਨੂੰ ਸੱਟ ਲੱਗਣ ਦਾ ਅਹਿਸਾਸ ਹੋਣ ਦੇ ਬਾਵਜੂਦ ਹੋਸਟ ਮੁਆਫ਼ੀ ਮੰਗਣ ਜਾਂ ਆਪਣੀ ਗ਼ਲਤੀ ਮੰਨਣ ਦੀ ਬਜਾਏ ਡਰੋਨ ਨੂੰ ਬਾਹਰ ਕੱਢਣ ਲਈ ਚੀਕਦਾ ਰਿਹਾ। ਯੂਜ਼ਰ ਨੇ ਉਸ ਨੂੰ ਸ਼ੋਅ ਤੋਂ ਹਟਾਉਣ ਦੀ ਮੰਗ ਵੀ ਕੀਤੀ।

ਇੱਕ ਹੋਰ ਯੂਜ਼ਰ ਨੇ ਮਾਡਲ ਪ੍ਰਤੀ ਹਮਦਰਦੀ ਜਤਾਉਂਦਿਆਂ ਕਿਹਾ ਕਿ ਹੋਸਟ ਨੇ ਉਸ ਨੂੰ ਦਿਲਾਸਾ ਦੇਣ ਜਾਂ ਮੁਆਫ਼ੀ ਮੰਗਣ ਦੀ ਕੋਸ਼ਿਸ਼ ਤੱਕ ਨਹੀਂ ਕੀਤੀ। ਇੱਕ ਹੋਰ ਵਿਅਕਤੀ ਨੇ ਇਸ ਨੂੰ ਗੈਰ-ਪੇਸ਼ੇਵਰ ਵਿਵਹਾਰ ਕਰਾਰ ਦਿੱਤਾ ਅਤੇ ਕਿਹਾ ਕਿ ਸਬੰਧਤ ਲੋਕਾਂ ਨੂੰ ਆਪਣੀ ਗ਼ਲਤੀ ਦੀ ਜ਼ਿੰਮੇਵਾਰੀ ਲੈਣੀ ਚਾਹੀਦੀ ਹੈ।

ਹੋਸਟ ਨੇ ਮੰਗੀ ਮੁਆਫ਼ੀ, ਨੁਕਸਾਨ ਦੀ ਭਰਪਾਈ ਦਾ ਭਰੋਸਾ

ਘਟਨਾ ਤੋਂ ਬਾਅਦ ਹੋਸਟ ਅਰਨੈਸਟੋ ਚਵਾਨਾ ਨੇ ਜਨਤਕ ਤੌਰ ’ਤੇ ਮੁਆਫ਼ੀ ਮੰਗੀ ਅਤੇ ਕਿਹਾ ਕਿ ਉਹ ਇਸ ਘਟਨਾ ਦੀ ਪੂਰੀ ਜ਼ਿੰਮੇਵਾਰੀ ਲੈਣਗੇ। ਪ੍ਰੋਡਕਸ਼ਨ ਟੀਮ ਦੇ ਨੁਮਾਇੰਦਿਆਂ ਨੇ ਵੀ ਨੁਕਸਾਨ ਦੀ ਭਰਪਾਈ ਕਰਨ ਦੀ ਪੁਸ਼ਟੀ ਕੀਤੀ।

ਮੈਡੀਕਲ ਸਹਾਇਤਾ ਮਿਲਣ ਤੋਂ ਬਾਅਦ ਇਸਾਬੇਲਾ ਰੋਜਾਸ ਮੁੜ ਸ਼ੋਅ ਵਿੱਚ ਵਾਪਸ ਆ ਗਈ। ਰਿਪੋਰਟਾਂ ਮੁਤਾਬਕ, ਉਸ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਸਨ, ਹਾਲਾਂਕਿ ਉਸ ਦੀ ਸਿਹਤ ਬਾਰੇ ਵਿਸਤ੍ਰਿਤ ਜਾਣਕਾਰੀ ਜਨਤਕ ਨਹੀਂ ਕੀਤੀ ਗਈ।